Il-konsumaturi qed jitolbu dejjem iktar informazzjoni dwar il-kimiċi fil-prodotti tat-tessut tagħhom biex jiżguraw li mhux qed jintużaw dawk perikolużi. Din il-leġiżlazzjoni dwar il-kimiċi u oħrajn iktar stretti jagħtu inċentiv lill-industrija tat-tessuti biex tissostitwixxi l-kimiċi perikolużi ma' alternattivi iktar sikuri. Ħafna mill-ikbar manifatturi tat-tessuti tad-dinja diġà ffurmaw inizjattiva konġunta biex inaqqsu n-numru ta' kimiċi perikolużi mill-prodotti tagħhom. Hemm diversi għodod u tekniki disponibbli biex jgħinu f'din is-sostituzzjoni fl-industrija tat-tessuti. Dawn l-għodod jistgħu jkunu utli għal setturi oħrajn ukoll.

Ikkunsidra l-użu, il-funzjoni u l-ħtieġa

Is-Sur Jerker Ligthart minn ChemSec, organizzazzjoni mingħajr skop ta' qligħ li taħdem għas-sigurtà kimika, jirrakkomanda li wieħed jaħseb dwar is-sostituzzjoni fuq tliet livelli differenti: il-funzjoni, l-użu u l-ħtieġa: "Inħarsu lejn l-użu tal-ftalati fl-istampar tal-PVC fuq it-tessuti bħala eżempju, il-funzjoni tal-ftalati hija li jagħmlu l-plastik tal-PVC artab. Jekk tikkunsidra biss din il-funzjoni, tista' ssib plastiċizzatur mhux ftalat alternattiv."

"Tista' wkoll tħares lejn l-użu, li huwa PVC għall-istampar tat-tessuti. Billi żżomm dan f'moħħok, tista' tikkunsidra li tbiddel għal tip ieħor ta' pejst tal-istampar li ma jeħtieġx plastiċizzaturi bħas-silikonu pereżempju."

"Madankollu, il-ħtieġa finali hija li jiġu prodotti tessuti li huma attraenti. Forsi dan jista' jinkiseb b'modi oħrajn, bħar-rakkmu. Skont il-mistoqsija, tista' tispiċċa b'diversi alternattivi possibbli dwar kif tissostitwixxi. Ir-rakkomandazzjoni tagħna hija li tħares lejn il-possibbiltajiet kollha sabiex ikollok kemm jista' jkun soluzzjonijiet", jgħid is-Sur Ligthart.

Qabel ma nimxu lejn il-valutazzjoni u l-paragun tal-alternattivi, huwa importanti li taħseb sewwa dwar xi trid minn alternattiva. X'tixtieq tikseb f'termini tal-profil tal-periklu u l-funzjonalità? Hemm limitu ta' spiża? Kemm hija urġenti s-sostituzzjoni? Diġà hemm rekwiżiti legali stabbiliti jew għandek ċans tistenna alternattiva li bħalissa qiegħda fi stadju ta' riċerka?

Li tagħmel użu minn dak li l-oħrajn qed jagħmlu huwa l-aħjar mod kif tibda bħala SMEs. Tista' ssib soluzzjonijiet alternattivi permezz ta' għarfien intern, assoċjazzjonijiet ta' kummerċ, netwerks ta' partijiet interessati, rapporti minn awtoritajiet, riżorsi bbażati fuq l-internet jew tistaqsi lill-fornituri tiegħek dwar x'jistgħu joffrulek minflok. Forsi diġà jipproduċu prodott alternattiv għal konsumaturi oħrajn u jistgħu jipprovduk bl-istess soluzzjoni.

Il-prijoritizzar tas-sustanzi tiegħek

Għall-industrija tat-tessuti, il-ħdax-il grupp ta' sustanzi mmirati mill-kampanja ta' disintossikazzjoni ta' Greenpeace huma taħt l-ikbar skrutinju u fosthom, il-PFCs għandhom prijorità għolja. Il-fenoli tal-alkil u s-sustanzi klorinati u brominati huma wkoll ta' tħassib kbir.

Għal dawk il-kimiċi fejn m'hemmx pressjoni esterna, trid tistabbilixxi l-prijoritajiet tiegħek skont il-politika tal-kumpanija. L-aspetti li ġejjin jistgħu jkunu ta' rilevanza:

• Il-kimiċi użati fi prodotti maħsubin għat-tfal
• Tipi ta' prodotti oħrajn li huma speċjalment viċin għall-konsumatur: oġġetti relatati mal-ikel u l-għalf, il-bjankerija tas-sodda u l-ħwejjeġ ta' taħt pereżempju
• It-tip ta' periklu fir-rigward tal-prodott Is-sensitizzaturi, pereżempju, huma partikolarment problematiċi meta jiġu f'kuntatt mal-ġilda; is-sustanzi b'perikli ambjentali huma partikolarment problematiċi fi prodotti tat-tlaħliħ u waqt l-ipproċessar tat-tessuti
• Kimiċi li jintużaw b'mod estensiv f'volumi kbar
• "Prodotti ewlenin" ta' importanza partikolari għall-kumpanija u r-reputazzjoni tagħhom

Is-Sur Ligthart jirrakkomanda l-użu tal-Gwida tat-Tessuti ta' ChemSec li tmexxik tul il-proċess tal-ġestjoni tal-kimiċi minn perspettiva tal-industrija tat-tessuti. Tgħin biex tidentifika sustanzi potenzjalment perikolużi fil-proċess tal-produzzjoni u biex tagħmel ċert li inti filfatt tkun qed tissostitwixxi għal alternattiva iktar sikura. L-għodda SINmilarity ta' ChemSec tista' tintuża wkoll biex tivverifika sostituti mhux magħrufa.