Il-biljetti tal-karti ta’ kreditu, l-irċevuti tal-bank, it-tikketti loġistiċi, il-biljetti tal-cash registers jew il-karti tal-fax għandhom xi ħaġa inkomuni: il-bisfenol A jew BPA. Fl-2014, Franza pproponiet li tillimita l-użu tal-BPA fil-karti termali u nediet sit web biex tgħin lill-kumpaniji jsibu alternattivi aktar siguri.

Bil-proposta Franċiża, bdiet it-tfittxija ta’ sustanzi jew tekniki alternattivi. Dr Aurélien Gouzy ta’ INERIS, iċ-ċentru nazzjonali kompetenti Franċiż għas-sigurtà industrijali u l-protezzjoni tal-ambjent, qed jaħdem sabiex jagħmel din is-sostituzzjoni tal-BPA realtà permezz ta’ sit web ta’ appoġġ dedikat li jippromwovi alternattivi aktar siguri għas-sustanza.

“Fi Franza ilna naħdmu ħafna fuq il-BPA sa mill-2012, meta l-gvern ippubblika strateġija nazzjonali fuq is-sustanzi li jfixklu s-sistema endokrinali. Fl-2014, f’konformità ma’ din l-istrateġija, il-Ministru għall-ambjent talab lid-distributuri l-kbar u lill-banek biex jieħdu impenn volontarju li jużaw karta termali mingħajr bisfenol. INERIS intalab jgħin fl-iżvilupp ta’ ‘tikketta mingħajr BPA’, li tista’ tinħareġ lil kull kumpanija b’politika kontra l-użu tal-BPA”, spjega Dr Gouzy.

Għajnuna proattiva

Il-proġett tas-sit web ‘SNA-BPA’ beda fl-2012 bħala reazzjoni bikrija għar-restrizzjoni potenzjali. Is-sit jipprovdi appoġġ operattiv lill-kumpaniji interessati f’soluzzjonijiet għas-sostituzzjoni tal-bisfenoli (BPA, BPS u BPF) bil-Franċiż u bl-Ingliż. Minbarra l-użu tal-BPA fil-karta termali, jgħin lill-kumpaniji jsibu alternattivi aktar siguri għall-BPA fil-polikarbonat, fir-raża epossidika, fil-kontenituri tal-ikel u f’diversi applikazzjonijiet oħrajn.

“L-utenti tal-paġna web jistgħu jiskambjaw ideat u informazzjoni bejniethom dwar il-bisfenoli. Inħeġġu lill-industrija taqsam l-informazzjoni rilevanti magħna”, jgħid Dr Gouzy.

Punt uniku ta’ servizz

B’aktar minn 1 000 żjara fix-xahar mid-dinja kollha, is-sit joffri l-aħħar aħbarijiet dwar is-sostituzzjoni tal-BPA, dokumenti tekniċi, il-mistoqsijiet l-aktar komuni u rapporti, kif ukoll tagħrif dwar il-qafas regolatorju attwali. L-utenti jistgħu jsibu wkoll riżorsi relatati ma’ bisfenoli oħrajn, bħall-BPS.

“Il-paġna tal-mistoqsijiet l-aktar komuni tiġi aġġornata regolarment u tirrifletti l-punti ewlenin li joħorġu mill-iskambju ta’ informazzjoni dwar l-alternattivi għall-BPA. Aħna nżommu kont tal-mistoqsijiet li jsiru l-aktar spiss u ndaħħlu t-tweġibiet mogħtija mill-esperti tagħna. Jekk ikun meħtieġ, partijiet terzi jgħinuna nfasslu t-tweġibiet,” jispjega Dr Gouzy.

Pjanijiet għall-ġejjieni: il-ftalati

L-isforzi ta’ INERIS biex jgħin lill-kumpaniji jissostitwixxu sustanzi kimiċi perikolużi ma jaslux sal-bisfenol. “Fl-2017, ser inniedu sit simili fuq waħda mis-sustanzi mill-familja ta’ ftalati,” jgħid Dr Gouzy.

“Nittamaw li l-ambizzjonijiet u l-inizjattiva innovattiva tagħna jkunu utli għall-kumpaniji madwar id-dinja u jrawmu s-sostituzzjoni. Is-sit web tagħna jista’ jitqies bħala eżempju u l-idea tintuża għal sustanzi oħrajn ukoll – kollha għall-benefiċċju tal-kompetittività u l-innovazzjoni Ewropej.”