Ladarba jkollok lista qasira ta’ alternattivi miġbura, kompli billi tqabbel l-għażliet u ddeċiedi liema waħda tkun l-aktar promettenti għall-użu tiegħek. Se jkollok bżonn twettaq il-valutazzjonijiet li ġejjin:

• Valutazzjoni tal-perikli u tar-riskju.
• Valutazzjoni tal-prestazzjoni.
• Valutazzjoni tal-vijabbiltà ekonomika.
• Valutazzjoni ta’ impatti oħra.

Meta tqabbel, għandek tikkunsidra wkoll effetti iktar wiesa’ bħall-użu tal-enerġija u tar-riżorsi, l-iskart, ir-riċiklaġġ jew l-impatt soċjali.

Żomm f’moħħok li proġett ta’ sostituzzjoni huwa l-aħjar approċċ fi proċess gradwali u iterattiv. Għandek bżonn tagħti prijorità lil liema elementi se tivvaluta l-ewwel u f’liema livell ta’ dettall — billi tiddeċiedi dan bil-quddiem meta tistabbilixxi l-ambitu għall-proġett ta’ sostituzzjoni.

Wara l-ewwel analiżi ta’ livell għoli, mur lura għall-kriterji li jidhru li huma kruċjali għat-teħid ta’ deċiżjonijiet u wettaq analiżi aktar bir-reqqa.

Għal alternattivi kimiċi, kun żgur li tivvaluta r-riskji tagħhom (periklu u esponiment). Iċċekkja jekk humiex fuq lista għal eżami aktar mill-qrib tal-ECHA jew tal-Istati Membri tal-UE – dawn jistgħu jkunu soġġetti għal miżuri regolatorji futuri u ma tkunx trid tissostitwixxi b’sustanza li dalwaqt tista’ tiġi indikata bħala ta’ tħassib. Uża bażijiet tad-data tat-tossikoloġija u mudelli tal-esponiment differenti biex tkun żgur li jkollok l-istampa kollha.

Minbarra l-valutazzjoni tal-perikli u r-riskji assoċjati mal-użu ta’ sustanzi alternattivi, huwa importanti wkoll li tivvaluta l-prestazzjoni u l-vijabbiltà ekonomika. Tista’ tkun tixtieq tagħmel użu minn metodi tad-diżinn sperimentali, li jippermettulek tistudja diversi varjabbli fl-istess ħin. Fl-aħħar nett, b’perspettiva taċ-ċiklu tal-ħajja, jaf ikollok bżonn tikkunsidra kompromessi potenzjali bejn l-għażliet alternattivi differenti (eż. periklu meta mqabbel mal-emissjonijiet ta’ gassijiet serra).