L-ECHA tirrapporta dwar il-progress li sar fl-2021 fl-evalwazzjoni tad-dossier u tas-sustanza f’konformità mal-Artikolu 54 ta’ REACH. 

Progress fil-kontrolli tal-konformità

Fl-2022, l-ECHA kompliet ix-xogħlijiet tagħha ta’ skrinjar għal sustanzi strutturalment simili fi gruppi: bħas-snin preċedenti, l-ECHA bdiet valutazzjonijiet għal madwar 2 000 sustanza. Abbażi tal-valutazzjonijiet ta’ grupp tal-ħtiġijiet regolatorji, fl-2022 l-ECHA għażlet 294 sustanza li tirrappreżenta 46 grupp għall-kontroll tal-konformità.

Intalbet data importanti dwar il-periklu biex jiġi kkjarifikat it-tħassib relatat mas-saħħa tal-bniedem u l-perikli ambjentali, inklużi dawk li jaffettwaw ir-riproduzzjoni u li jikkawżaw mutazzjonijiet ġenetiċi.

Fl-2022, l-ECHA wettqet 302 kontrolli tal-konformità kompleti li koprew 258 sustanza unika. Il-kontrolli kompleti iffukaw fuq l-indirizzar tal-end-point ta’ periklu ta’ livell ogħla rilevanti għal sustanzi jew gruppi ta’ sustanzi ta’ tħassib potenzjali prinċipalment fil-meded ta’ tunnellaġġ ogħla. Barra minn hekk, l-ECHA wettqet 28 kontroll tal-konformità mmirati, li flimkien mal-kontrolli kompleti, irriżultaw f’ammont totali ta’ 330 kontroll tal-konformità mwettqa fl-2022, li jkopru iktar minn 2 300 dossier ta’ reġistrazzjoni, u li jindirizzaw 295 sustanza unika.

Fl-2022, l-Aġenzija kompliet il-kontrolli tal-konformità ta’ dawk id-dossiers fejn ir-reġistranti għażlu li ma jipparteċipawx f’sottomissjoni konġunta u minflok issottomettew l-informazzjoni tagħhom separatament. Il-kontrolli ta’ dawn id-dossiers jikkontribwixxu biex jiġu żgurati kundizzjonijiet ekwi u jiġi appoġġat il-funzjonament tas-suq intern. L-Aġenzija wettqet kontrolli tal-konformità għal 13-il dossier li jkopru 9 sustanzi sottomessi minn kumpaniji li għażlu li ma jipparteċipawx f’sottomissjonijiet konġunti. Konsegwentement, intbagħtu 12-il abbozz ta’ deċiżjoni għal 11-il sustanza.

Output tal-valutazzjonijiet tad-dossier fl-2022

L-ECHA wettqet 302 kontrolli tal-konformità kompleti (CCHs) u 213-il eżaminazzjoni ta’ proposti ta’ ttestjar (TPEs), li kienu jkopru 360 sustanza unika. L-għażla tar-reġistrazzjonijiet għall-kontroll tal-konformità kienet ibbażata prinċipalment fuq (gruppi ta’) sustanzi li jqajmu tħassib potenzjali bbażat fuq il-periklu jew l-esponiment.
L-ECHA ħarġet 459 abbozz ta’ deċiżjoni: Kien hemm 277 dwar il-kontrolli tal-konformità msemmija hawn fuq u 182 dwar l-eżaminazzjonijiet ta’ proposti ta’ ttestjar.