ECHA

L-NMEG jappoġġja l-implimentazzjoni tal-Pjan ta’ Ħidma tal-ECHA għan-Nanomaterjali għall-2016-2018 u jipprovdi konsulenza informali dwar kwistjonijiet tekniċi u xjentifiċi rigward l-implimentazzjoni tal-leġiżlazzjonijiet REACH, CLP u BPR fir-rigward ta’ nanomaterjali.

L-NMEG kien stabbilit f’Ottubru 2012 bl-appoġġ tal-awtoritajiet kompetenti għal REACH u għal CLP (CARACAL) u l-awtoritajiet kompetenti għall-prodotti bijoċidali.

Il-grupp ta’ esperti hu kkoordinat u ospitat mill-ECHA. L-aġendi għal-laqgħat huma żviluppati f’konsultazzjoni mal-membri tal-NMEG permezz ta’ proposti mill-esperti parteċipanti, mill-membri tal-awtoritajiet kompetenti tal-Istati Membri (MSCAs), tal-Kumitat tal-Istati Membri (MSC), tal-Kumitat għall-Istima tar-Riskji (RAC) u tal-Kumitat dwar il-Prodotti Bijoċidali (BPC), mis-segretarjat tal-ECHA, mill-Kummissjoni Ewropea, mill-Aġenziji l-oħra tal-UE u mir-rappreżentanti mill-industrija u minn organizzazzjonijiet mhux governattivi.

L-NMEG hu grupp ta’ esperti informali li jipprovdi konsulenza dwar kwistjonijiet xjentifiċi u tekniċi rigward l-implimentazzjoni tar-Regolamenti REACH, CLP u dwar il-Prodotti Bijoċidali rigward in-nanomaterjali. Il-mandat tal-NMEG ġie aġġornat fi Frar 2017.

 

Id-diskussjonijiet fl-NMEG jiffaċilitaw l-iskambju ta’ għarfien bejn l-MSCAs, l-NGOs u l-industrija, li jrawmu fehim akbar dwar kwistjonijiet speċifiċi relatati man-nanomaterjali, li jwasslu għal iktar diskussjonijiet effiċjenti fil-livell tal-MSC, tal-RAC u tal-BPC.

Dan jista’ jtejjeb il-kapaċità tal-MSCAs li jevalwaw in-nanomaterjali u jħaffu l-proċess tat-teħid ta’ deċiżjonijiet rigward id-dossiers li jinvolvu lilhom. Iktar importanti minn hekk, joħloq forum għall-partijiet kollha involuti fid-diskussjoni dwar is-sikurezza tan-nanomaterjali, biex jaqsmu l-opinjonijiet tagħhom f’ambjent kollaborattiv.

L-NMEG m’għandux rwol formali f’xi proċess regolatorju u għalhekk ma jindaħalx fit-teħid ta’ deċiżjonijiet taħt REACH, CLP jew BPR.

Il-parteċipanti tal-NMEG huma esperti nnominati:

• Minn awtoritajiet kompetenti tal-Istati Membri tal-UE
• MiIl-Kummissjoni Ewropea: Mid-DĠ Ambjent (ENV), DĠ Suq Intern, Industrija, Intraprenditorija u SMEs(GROW), u ċ-Ċentru Konġunt ta’ Riċerka (JRC)
• Mill-Awtorità Ewropea dwar is-Sigurtà fl-Ikel (EFSA)
• Minn Organizzazzjonijiet tal-Partijiet Ikkonċernati
  • Minn Assoċjazzjonijiet tal-Industrija
  • Minn organizzazzjonijiet mhux governattivi

It-temi għall-aġenda tal-NMEG huma ssuġġeriti mill-ECHA jew mill-membri tal-grupp ta’ esperti. Ġeneralment, is-sessjonijiet huma miftuħin għall-parteċipanti kollha, iżda huma possibbli wkoll sessjonijiet magħluqa mal-awtoritajiet biss.

Fost it-temi ewlenin li ġew indirizzati mill-NMEG hemm: l-isfidi tekniċi tar-reġistrazzjoni u biex jiġu kkaratterizzati s-sustanzi; ir-rappurtar prattiku f’IUCLID; il-valutazzjoni ta’ perikli tan-nanomaterjali għall-ambjent u għas-saħħa tal-bniedem; l-aġġornamenti fuq dossiers speċifiċi jew fuq każijiet ta’ valutazzjoni tas-sustanza (f’sessjonijiet magħluqa). L-NMEG iddiskuta wkoll kwistjonijiet relatati mal-iżvilupp tad-dokumenti ta’ gwida ta’ REACH għan-nanomaterjali.