L-ECHA hija responsabbli mill-pubblikazzjoni tal-lista tas-sustanzi rilevanti u mis-sustanza rispettiva u mill-fornituri tal-prodott, skont l-Artikolu 95 tar-Regolament dwar il-Prodotti Bijoċidali (BPR), kif emendat mir-Regolament (UE) Nru 334/2014 tal-11 ta’ Marzu 2014. L-għan ta’ din il-lista huwa li “tiżgura t-trattament ugwali ta’ persuni li jqiegħdu sustanzi attivi fis-suq” (premessa 8 tar-Regolament dwar il-Prodotti Bijoċidali).
Il-fornituri fuq il-lista tal-Artikolu 95 jinkludu parteċipanti fil-Programm ta’ Reviżjoni, sostenituri ta’ sustanzi attivi ġodda, li ssottomettew dossier skont l-Artikolu 11 tad-Direttiva dwar il-Prodotti Bijoċidali, BPD (Direttiva 98/8 /KE) jew skont l-Artikolu 7 tal-BPR, sottomettituri ta’ applikazzjonijiet għal awtorizzazzjoni ta’ prodott fejn l-applikazzjoni tinkludi dossier tas-sustanza attiva alternattiva (l-hekk imsejjaħ “dossier ta’ parti terza”), kif ukoll fornituri li ssottomettew applikazzjoni f’konformità mal-Artikolu 95(1) tal-BPR u li tkun instabet konformi mill-ECHA.
Mill-1 ta’ Settembru 2015, prodott bijoċidali ma jistax ikun disponibbli fis-suq tal-UE sakemm jew il-fornitur tas-sustanza jew il-fornitur tal-prodott ma jkunux inklużi fil-lista tal-Artikolu 95 għall-PT li għaliha jkun jappartjeni l-prodott.
L-ECHA taġġorna l-lista tal-Artikolu 95 fuq bażi regolari. L-informazzjoni fil-lista hija preċiża sal-punt tal-għarfien tal-ECHA. Biex entrata fil-lista tal-Artikolu 95 tiġi kkoreġuta, l-applikant jeħtieġ li jagħmel il-bidla rilevanti fl-R4BP3 (eż. għall-parteċipanti tal-Programm ta’ Reviżjoni fejn l-applikazzjoni tas-sustanza attiva għadha ma ġietx approvata, u kumpaniji li huma elenkati abbażi ta’ applikazzjoni għall-inklużjoni fl-Artikolu 95). Fejn dan ma jkunx possibbli (għal aktar dettalji, ara l-Anness għall-formola “Talba għal korrezzjonijiet ta’ entrata fil-lista tal-Artikolu 95”), il-kumpaniji jridu jitolbu l-bidla billi jissottomettu l-formola msemmija qabel permezz tal-formoli ta’ kuntatt tal-ECHA. Skont il-kumplessità tat-talba għal modifika, iż-żmien biex din titqies jista’ jvarja.
F’każ ta’ dubju, jew għal struzzjonijiet dwar kif tagħmel ċerta bidla fl-R4BP 3, jekk jogħġbok ikkuntattja lill-helpdesk tal-ECHA permezz tal-formoli ta’ kuntatt tal-ECHA.