Introduzzjoni

Kwalunkwe sustanza kimika li potenzjalment tista' tikkawża ħsara hija kkunsidrata bħala perikoluża. Ċerti sustanzi kimiċi jistgħu jikkawżaw tipi differenti ta' ħsara, li tvarja minn irritazzjoni ħafifa tal-ġilda sa kanċer. Dawn jistgħu wkoll ikollhom impatti sinifikanti fuq l-ambjent, inkluż l-arja, l-ilma u l-art; u jistgħu jaffettwaw ħażin il-pjanti u l-annimali.

Sustanza kimika tista' biss tikkawża ħsara lil saħħitna jew lill-ambjent, jekk inkunu esposti għaliha. Biex nipproteġu lilna nfusna minn sustanzi kimiċi perikolużi, dawn għandhom jiġu mmaniġġjati b'mod xieraq biex b'hekk l-esponiment ikun jista' jitnaqqas għal livell aċċettabbli - jew ikunu jridu jiġu ssostitwiti minn alternattivi aktar siguri.

Sustanza tiġi kklassifikata fil-livell tal-UE meta jkollha ċerti karatteristiċi ta' ħsara. L-inventarju sħiħ ta' sustanzi kklassifikati huwa disponibbli fuq il-websajt tal-ECHA. Tista' ssir taf ukoll kif għandhom jiġu ttikkettati dawn is-sustanzi.

Hemm applikabbli firxa sħiħa ta' miżuri protettivi regolatorji għal sustanzi kimiċi perikolużi skont REACH u leġiżlazzjoni oħra tal-UE.  Pereżempju, jeżistu restrizzjonijiet  fuq il-provvista lill-konsumaturi ta' diversi sustanzi perikolużi. Oħrajn jistgħu biss jitqiegħdu fis-suq jekk ikun ġie awtorizzat użu speċifiku.