Il-Kumitat tal-Istati Membri (MSC) jipparteċipa f'diversi proċessi ta' REACH bħall-evalwazzjoni u l-awtorizzazzjoni. L-MSC huwa responsabbli mir-riżoluzzjoni ta' diverġenzi ta' opinjonijiet fost l-Istati Membri u dwar proposti għall-identifikazzjoni ta' Sustanzi ta' Tħassib Serju Ħafna (SVHCs). Il-Kumitat jipprovdi opinjonijiet dwar l-abbozz ta' rakkomandazzjoni tal-ECHA għal-lista ta' awtorizzazzjoni (Anness XIV) u l-abbozz ta' Pjan ta’ Azzjoni Rikorrenti Komunitarju (CoRAP) għall-proċess tal-evalwazzjoni tas-sustanzi. Jekk ma jintlaħaqx qbil fi ħdan l-MSC, il-kwistjoni tiġi riferuta lill-Kummissjoni Ewropea għat-teħid ta' deċiżjoni.

L-evalwazzjoni tad-dossier

Meta l-emendi huma proposti mill-Istati Membri, l-MSC jfittex li jintlaħaq qbil unanimu dwar l-abbozz tad-deċiżjonijiet dwar: 

• Proposti ta’ ttestjar
• Kontrolli ta' konformità

L-evalwazzjoni tas-sustanzi

L-MSC jfittex li jintlaħaq qbil unanimu dwar abbozz ta' deċiżjonijiet tal-Istat Membru dwar l-evalwazzjoni tas-sustanzi meta jiġu proposti l-emendi dwarhom minn Stati Membri oħrajn jew mill-ECHA. L-MSC jqis il-kummenti tar-reġistranti dwar l-emendi proposti għall-abbozz tad-deċiżjonijiet abbażi tad-dossier u l-evalwazzjonijiet tas-sustanzi. Ladarba jintlaħaq qbil mill-MSC, l-ECHA tiffinalizza d-deċiżjoni u tipprovdiha lir-reġistrant.

L-MSC jipprovdi fehmiet dwar:

• Abbozz ta' Pjan ta’ Azzjoni Rikorrenti Komunitarju (CoRAP) mħejji mill-ECHA għal sustanzi li għandhom jiġu evalwati mill-Istati Membri fuq il-bażi li s-sustanzi jistgħu joħolqu riskju għas-saħħa tal-bniedem jew għall-ambjent.
• Proposti minn kwalunkwe Stat Membru sabiex iżid sustanzi fil-CoRAP lil hinn mill-aġġornamenti annwali.

Abbażi ta' dawn il-fehmiet tal-MSC, l-ECHA tadotta l-CoRAP finali għall-evalwazzjoni tas-sustanzi. L-MSC jfittex ukoll li jintlaħaq qbil dwar każijiet fejn żewġ Stati Membri jew aktar esprimew interess fl-evalwazzjoni tal-istess sustanza.

Awtorizzazzjoni

L-MSC għandu rwol essenzjali f'li:

• Jintlaħaq qbil dwar l-identifikazzjoni ta' Sustanzi ta' Tħassib Serju Ħafna (SVHCs) għal-lista ta' kandidati ta' sustanzi għall-inklużjoni potenzjali fil-lista ta' awtorizzazzjoni (Anness XIV). 
• Jipprovdi fehmiet dwar l-abbozz tar-rakkomandazzjonijiet tal-ECHA dwar sustanzi ta' prijorità għall-inklużjoni fil-lista tal-awtorizzazzjoni.

L-ECHA tqis il-fehma tal-MSC meta tiffinalizza r-rakkomandazzjoni tagħha lill-Kummissjoni dwar sustanzi ta' prijorità għall-inklużjoni fil-lista tal-awtorizzazzjoni.

It-talbiet tad-Direttur Eżekuttiv tal-ECHA

Fuq talba tad-Direttur Eżekuttiv tal-ECHA, l-MSC joħroġ fehmiet relatati mar-riskji għas-saħħa tal-bniedem u għall-ambjent dwar kwalunkwe aspett ieħor li jikkonċerna s-sigurtà ta’ sustanzi waħidhom, fi preparazzjonijiet jew f’oġġetti. 

L-MSC jipprovdi wkoll appoġġ xjentifiku biex tittejjeb il-kooperazzjoni bejn il-Komunità, l-Istati Membri tagħha, l-organizzazzjonijiet internazzjonali u pajjiżi terzi relatati mas-sigurtà tas-sustanzi, kif ukoll parteċipazzjoni attiva fl-għajnuna teknika u fl-attivitajiet ta’ bini tal-kapaċità dwar il-ġestjoni b’saħħitha tal-kimiċi f’pajjiżi li qed jiżviluppaw.

Kompożizzjoni

Kull Stat Membru jaħtar membru wieħed għall-MSC għal terminu li jiġġedded ta’ tliet snin. Il-Kumitat jista' jaħtar sa' ħames membri addizzjonali magħżula għall-kompetenzi speċifiċi tagħhom. Il-membri jistgħu jkunu akkumpanjati minn konsulenti.