Il-Kumitat għall-Istima tar-Riskji (RAC) jħejji l-fehmiet tal-ECHA relatati mar-riskji tas-sustanzi għas-saħħa tal-bniedem u tal-ambjent fil-proċessi li ġejjin ta’ REACH u ta’ CLP. Id-deċiżjonijiet finali jittieħdu mill-Kummissjoni Ewropea.

Klassifikazzjoni u Tikkettar Armonizzati

Ir-RAC jeżamina l-proposti għall-klassifikazzjoni u t-tikkettar armonizzati u jagħti fehma dwar il-klassifikazzjoni armonizzata proposta ta' sustanzi bħala karċinoġeniċi, mutaġeniċi, tossiċi għar-riproduzzjoni jew bħala sensitizzatur respiratorju, kif ukoll bħala effetti oħrajn fuq bażi ta' każ b'każ.  

Restrizzjoni 

Il-Kumitat jevalwa jekk ir-restrizzjoni proposta fuq il-manifattura, it-tqegħid fis-suq jew l-użu tas-sustanza hijiex xierqa għat-tnaqqis tar-riskju għas-saħħa tal-bniedem u tal-ambjent. Din tinkludi l-valutazzjoni tal-kummenti ppreżentati minn partijiet terzi.

Awtorizzazzjoni 

Ir-RAC jivvaluta r-riskju ta' sustanza li jirriżulta mill-użi ta' sustanza meta tiġi ppreżentata applikazzjoni għall-awtorizzazzjoni. Dan jinkludi valutazzjoni tal-adegwatezza u tal-effikaċja tal-miżuri tal-ġestjoni tar-riskji kif deskritt fl-applikazzjoni tal-awtorizzazjoni, u jekk rilevanti, tar-riskji ta’ alternattivi possibbli. Kontributi ta’ parti terza relatati mal-applikazzjoni sejrin jiġu vvalutati wkoll.

It-talbiet tad-Direttur Eżekuttiv tal-ECHA

Ir-RAC jagħti fehma fuq talba tad-Direttur Eżekuttiv tal-ECHA relatati mar-riskji għas-saħħa tal-bniedem u għall-ambjent dwar kwalunkwe aspett ieħor li jikkonċerna s-sigurtà ta’ sustanzi waħidhom, fi preparazzjonijiet jew f’oġġetti. 

Il-Kumitat jipprovdi wkoll appoġġ xjentifiku biex tittejjeb il-kooperazzjoni bejn il-Komunità, l-Istati Membri tagħha, organizzazzjonijiet internazzjonali u pajjiżi terzi relatati mas-sigurtà tas-sustanzi, kif ukoll parteċipazzjoni attiva fl-għajnuna teknika u attivitajiet ta’ bini tal-kapaċità dwar il-ġestjoni b’saħħitha tas-sustanzi kimiċi f’pajjiżi li għadhom qed jiżviluppaw.

Kompożizzjoni

Il-membri tar-RAC jinħatru mill-Bord tat-Tmexxija tal-ECHA abbażi ta' kandidati nnominati mill-Istati Membri għal terminu li jiġġedded ta' tliet snin.