L-ECHA tivvaluta regolarment is-sustanzi mil-Lista ta’ Kandidati biex tiddetermina liema minnhom għandhom jiġu inklużi fil-Lista tal-Awtorizzazzjoni bħala prijorità. Il-prijoritizzazzjoni tiġi bbażata fuq informazzjoni dwar il-karatteristiċi intrinsiċi, użu mxerred ħafna jew volumi għoljin li jaqgħu fi ħdan il-kamp ta’ applikazzjoni tar-rekwiżit tal-awtorizzazzjoni. L-ECHA tniedi konsultazzjoni li ddum tliet xhur bħala parti mill-proċess.

L-abbozz tar-rakkomandazzjoni jinkludi, fost affarijiet oħra, din l-informazzjoni:

• Data tat-Terminazzjoni minn meta t-tqegħid fis-suq u l-użu ta’ sustanza jkun ipprojbit, sakemm ma tingħatax awtorizzazzjoni jew l-użu ma jkunx eżentat mill-awtorizzazzjoni;
• Id-data l-iktar tard tal-applikazzjoni sa meta għandhom jiġu riċevuti l-applikazzjonijiet jekk l-applikant jixtieq ikompli jqiegħed is-sustanza fis-suq jew jużaha wara d-data tat-terminazzjoni;
• Perjodi ta’ rieżami għal ċertu użu, jekk ikun hemm;
• Użu eżentat mir-rekwiżit tal-awtorizzazzjoni, jekk ikun hemm.

Il-Kumitat tal-Istati Membri jipprepara l-opinjoni tiegħu dwar l-abbozz tar-rakkomandazzjoni waqt li jikkunsidra l-kummenti li jirċievi matul il-konsultazzjoni.

L-opinjoni tal-kumitat u l-kummenti riċevuti waqt il-konsultazzjoni se jgħinu lill-ECHA tiffinalizza r-rakkomandazzjoni tagħha. Ir-rakkomandazzjoni tal-ECHA tiġi ppreżentata lill-Kummissjoni Ewropea, li tiddeċiedi dwar is-sustanzi li għandhom jiġu inklużi fil-Lista tal-Awtorizzazzjoni.

Eżenzjonijiet

Hemm xi eżenzjonijiet ġeneriċi mir-rekwiżit tal-awtorizzazzjoni. Minbarra dawn l-eżenzjonijiet ġeneriċi, l-ECHA tista’ tipproponi eżenzjonijiet speċifiċi għal sustanzi u użu, meta tkun diġà teżisti leġiżlazzjoni tal-UE li tipprovdi r-rekwiżiti minimi għall-kontroll kif suppost tar-riskji biex tiġi protetta s-saħħa tal-bniedem jew tal-ambjent.

Dawn l-eżenzjonijiet huma ddettaljati fir-rakkomandazzjoni li l-ECHA tippreżenta lill-Kummissjoni.